Friday, March 2, 2018

ஆரோக்கியம் நல்வாழ்வு குழுவில் பேலியோ முயற்சிப்பவர்களுக்கான வழிகாட்டி.


எச்சரிக்கை:
இந்த உணவுமுறை மருத்துவரால்/ டயட்டிசியனால் எழுதபட்டது கிடையாது. சராசரி குடிமகனால் சொந்த அனுபவம், படித்து தெரிந்துகொண்டது ஆகியவற்றின் பேரில் எழுதபட்டது. இந்த உணவுமுறையைத் துவக்குமுன் மருத்துவர் அறிவுரையை கேட்டுகொன்டு பின்பற்றூவது நலம்

இந்த உணவுமுறையால் கொலஸ்டிரால் & எல்டிஎல் ஏறும். சுகர் இறங்கும். பிளட் பிரஷர் கட்டுபாட்டில் வரும். இதற்கான காரணங்கள் தெளிவாக விளக்கப்பட்டுள்ளன. படித்து அறிந்துகொள்ளவும்.

இந்த ரெசிப்பிக்களால் சுகர் இறங்குவதால் அதற்கு தகுந்தபடி சுகர் மாத்திரை அளவை மருத்துவர் அறிவுரையின் பேரில் குறைத்துகொள்வதும், சுகர் லெவலை அடிக்கடி மானிட்டர் செய்து லோ சுகர் ஆகாமல் பார்த்துகொள்வதும் அவசியம்.

இது பொதுவாக சுகருக்கும், எடைகுறைப்புக்கும் எழுதபட்டது. அத்துடன் வேறு எதாவது சிக்கல்கள், வியாதிகள் (உதா: கிட்னி பிரச்சனை) இருந்தால் அம்மாதிரி பிரச்சனைகளை மனதில் வைத்து இது எழுதபடவில்லை. அம்மாதிரி சூழலில் இதை மருத்துவ ஆலோசனை இன்றிப் பின்பற்றவேண்டாம்.


ஆரோக்கியம் நல்வாழ்வு குழு சார்பாக உடல் ஆரோக்கியத்திற்காக இந்த உணவுமுறையை முயற்சிக்க வந்த உங்களை வரவேற்கிறோம். இந்த உணவுமுறை என்பது நாம் அன்றாடம் உண்ணும் உணவுகளில் சிலவற்றைக் குறைத்து (மாவுச்சத்து உணவுகள்) சிலவற்றைக் கூட்டி (நல்ல கொழுப்பு உணவுகள்) வீட்டிலேயே சமைத்து உண்ணும் எளிய உணவுமுறைதான்.
நீங்கள் வெறும் உடல் எடையைக் குறைக்க பேலியோவிற்கு வந்திருந்தாலோ அல்லது கறி, முட்டை உண்பதற்கான சாக்காக பேலியோவை அணுகுவதோ தவறு. உங்களுக்கு தேவையான உடல் எடையைக் குறைத்தபிறகு மீண்டும் பிரியாணி, பரோட்டா, இனிப்புகள், ஐஸ்க்ரீம், சமோசா என்று வெளுத்துக் கட்ட ஆசை இருப்பின் இதோடு பேலியோவை மறந்துவிட்டு கீழுள்ள லிங்கில் இருக்கும் ஏதாவது ஒரு டயட்டை உங்கள் விருப்பம் / சுய அறிவு சார்ந்து தேர்ந்தெடுத்து அதனைப் பின்பற்றவும்.
https://health.usnews.com/best-diet/best-weight-loss-diets
கல்யாணத்தில் என்னால் விருந்து சாப்பிடாமல் இருக்க முடியாது, ஸ்வீட் சாப்பிடாமல் இருக்க முடியாது, அடிக்கடி சீட்டிங் செய்வேன், 30 நாளில் மீண்டும் பழைய உணவுக்கு திரும்பிவிடுவேன். கல்யாணத்திற்காக முயற்சிக்கிறேன், சினிமாவுக்காக முயற்சிக்கிறேன் போன்ற எண்ணமிருப்பின் உங்களுக்கு பேலியோ ஒத்து வராது. எங்கள் மற்றும் உங்கள் நேரத்தை வீணாக்க வேண்டாம்.
--
இனி பேலியோ என்பது ஒரு வாழ்க்கை முறை இது அதிக நல்ல கொழுப்பும், மாவுச்சத்து மற்றும் உடலுக்கு தீங்கு விளைவிக்கும் சத்தில்லாத ருசி சார்ந்த உணவுகளை விலக்கச் சொல்லி ஆரோக்கியத்தை மீட்டெடுக்கும் ஒரு சித்தாந்தம், இதை முழுமையாக, கட்டுப்பாட்டுடன் முழுவதுமாகப் புரிந்துகொண்டு, குடும்பம், மருத்துவர், உற்றார் உறவினர்கள், நண்பர்கள் ஒப்புதலோடு ஆரம்பிக்க நினைப்பவர்கள் மேற்கொண்டு படித்து சரியாகப் புரிந்துகொண்டு அதன் பின் பேலியோ முயற்சிக்கவும்.


இந்த பேலியோ உணவுமுறையை முயற்சிப்பதற்கு முன்பாக கீழுள்ளவற்றைக் கவனமாகப் படிக்கவும். கீழே கொடுக்கப்படும் லிங்குகள் அனைத்தும் உங்களுக்கு எழக்கூடிய சந்தேகங்களுக்கான அடிப்படை விளக்கங்கள். இவற்றைப் படிக்காமல் குழுவில் கேள்வி கேட்பதைத் தவிருங்கள். பொறுமையாக நேரம் ஒதுக்கி இவற்றைப் படிக்குமாறு கேட்டுக்கொள்கிறோம்.
பேலியோவிற்கு வருவதற்கு முன்பாக ரத்தப் பரிசோதனைகள் கட்டாயம் எடுக்கவேண்டும். அதை எடுத்தபிறகு அதை ஒரு எக்ஸல் ஷீட்டில் நிரப்பி அதனை நீங்கள் குழுவில் போஸ்ட் செய்து இந்தப் பரிந்துரையைப் பெறலாம். ரத்தப் பரிசோதனை செய்யாது அடுத்தவரைப் பார்த்து காப்பி அடித்து பேலியோ முயற்சிப்பது ஆபத்தானது.
ரத்தப் பரிசோதனைகளை கீழ்க்கண்ட லேபுகளில் குறைந்த விலைக்கு செய்துகொள்ள முடியும்.

ஆர்பிடோ லேப் & ஸ்கான்ஸ் – 9087690877, 9344113880
ஆர்த்தி ஸ்கான்ஸ் : 99400 22667, 044- 66007700
தைரோகேர் – 022-30900000 / 41252525 அல்லது PALEO என்று 9870666333 என்ற எண்ணுக்கு எஸ் எம் எஸ் அனுப்பி பேலியோ 1.7 டெஸ்ட் எடுக்கவும்.
மேற்கூறிய லேபுகள் உங்க்ள் வீட்டிற்கே வந்து ரத்த மாதிரிகளை எடுத்து உங்கள் மெயிலுக்கு அல்லது முகவரிக்கு ரிப்போர்ட்களை அனுப்பி வைப்பார்கள். முதன்முறை முழுமையான டெஸ்ட்கள் எடுப்பது நல்லது. அதிக எடை, அதிக நாட்கள் டயபடிக்கால் பாதிக்கப்பட்டவர்கள் முழு பேலியோ ரத்தப் பரிசோதனையுடன் அப்டமன் ஸ்கேனும் சேர்த்து எடுப்பது நல்லது. உங்கள் ரிப்போர்ட்டுடன் அவர்கள் தரும் எக்ஸல் ஷீட்டினை போட்டோ எடுத்து அதை ஆரோக்கியம் நல்வாழ்வு Facebook குழுவில் (www.facebook.com/groups/tamilhealth) Post செய்து உங்கள் உடல் பிரச்னைகள், நீங்கள் உண்ணும்  மாத்திரைகள், சமீபத்தில் உங்களுக்கு ஏற்பட்ட உடல்நலக் குறைபாடு அல்லது அறுவைசிகிச்சை போன்ற விவரங்களுடன் நீங்கள் சைவமா? அசைவமா என்பதைத் தெளிவாகக் குறிப்பிட்டு உணவுப்பரிந்துரை வாங்கிக்கொண்டு சரியாகக் கடைபிடிக்கவும்.

உங்களுக்கான உணவுப்பரிந்துரை உதாரணமாக இவ்வாறு இருக்கலாம்:

காலை முட்டை, மதியம் பேலியோ காய்கறிகள், இரவு இறைச்சி அல்லது பனீர் அல்லது பாதாம்.
பேலியோவில் பரிந்துரைக்கக்கூடிய பொருட்கள் உங்கள் அருகாமை கடைகளிலேயே கிடைக்கும். அல்லது எங்களின் மற்றொரு குழுவான பேலியோ சந்தையைய் பயன்படுத்தி அதில் விற்பனையாளர்களிடம் விலைவிவரம் அறிந்து பொருட்களை வாங்கிக்கொள்ளலாம்.

உங்கள் வழக்கமான உணவில் இருந்து இது மாறுபடுவதாலும், நீங்கள் அன்றாடம் சமைக்கப் பயன்படுத்தும் பொருட்களில் 90% விலக்கப்படுவதாலும் எப்படிச் சமைப்பது? எப்படி போரடிக்காமல் விதவிதமாக சுவையாக உண்பது என்ற சந்தேகம் இருப்பின் எங்கள் ரெசிபி குழுவான இந்தக் குழுவில் இணைந்து உங்களுக்குத் தேவையான ரெசிபிக்களை நீங்கள் முயற்சிக்கலாம்.
ரத்தப் பரிசோதனை செய்துவிட்டீர்கள்.
உணவுப் பரிந்துரை வாங்கிவிட்டீர்கள்.
பேலியோ முயற்சிப்பதற்கான உணவுகள் எங்கே கிடைக்கும் என்பதையும் தெரிந்துகொண்டீர்கள்.
உணவு எப்படி தயார் செய்வது என்ற ரெசிபிக்களையும் தெரிந்துகொண்டீர்கள்.

இனி என்ன? பேலியோ ஆரம்பித்துவிட்டீர்கள்.
அன்றாடம் சந்தேகங்கள் வரும்? பேலியோ துவங்கியவுடன் தலை வலிக்கிறதே, உடலெல்லாம் தடதடவென்று ஆடுகிறதே? ஒரு வாரத்தில் 5 கிலோ எடை குறைந்துவிட்டதே இது ஆரோக்கியமா? ஆபத்தா? காலையும் மதியமும் முட்டை உண்ணலாமா? தேங்காய் எண்ணெய் குடிக்கலாமா? ஆப்பிள் சைடர் வினிகர் என்றால் என்ன? கெபிர் தயிர் என்றால் என்ன? திடீரென்று உடலுக்கு ஜுரம், வாந்திபேதி வந்தால் என்ன செய்வது? இந்துப்பு என்றால் என்ன? செக்கில் ஆட்டிய கடலெண்ணெய் சேர்க்கலாமா? புளி உபயோகிக்கலாமா? ப்ராய்லர் சிக்கன் ஆபத்தா? முட்டைசாப்பிட்டால் வாயுத் தொல்லை வருமே? அசிடிடிட்க்கு மட்டன் ஒத்துக்கொள்ளுமா? இளநீர் குடிக்கலாமா? சரக்கடிக்கலாமா? சிகரெட் பிடிக்கலாமா? ஒருவேளை சோறு, இரண்டுவேளை பேலியோ முயற்சிக்கலாமா? தேன்+வெந்நீர் குடிக்கலாமா? என்று ஆயிரம் கேள்விகள் உங்களுக்கு எழலாம்.
இந்தத் தளத்தில் இதற்கான விடைகள் தொகுக்கப்பட்டுள்ளது. பொறுமையாக அனைத்து தலைப்புகளையும் படிக்கவும்.
பேலியோ முயற்சித்து உடல் எடை குறைத்தவுடன் உங்களைச் சுற்றி இருப்பவர்கள் கொழுப்பு ஆபத்து மாரடைப்பு வரும் என்று சொல்லும்பொழுது கீழுள்ள இணைப்பைக் கவனமாகப் படித்து கொழுப்பு பற்றி அறிந்துகொள்ளவும்.
கொலஸ்டிரால் அல்லது கொழுப்பு உண்மையில் ஆபத்தானதா?



எல்லாம் சரி இதனால் பலனடைந்தவர்கள் இருக்கிறார்களா? என்று கேள்வி வந்தால் கீழுள்ள குழுவில் சேர்ந்து பலனடைந்தவர்கள் அனுபவங்களைப் படித்து தெளிவுறவும்.
நீங்கள் புரிந்துகொண்டு பேலியோ முயற்சித்துப் பலனடைந்துவிட்டீர்கள், உங்கள் நண்பருக்கு அறிமுகம் செய்ய விரும்புகிறீர்கள். அவருக்கு தமிழ் தெரியாது. ஆங்கிலம் மட்டுமே தெரியும் என்றால் கீழுள்ள எங்கள் ஆங்கிலக்குழுவில் சேர்ந்து பலனடையவும்.
நீங்கள் நீண்டகால டயபடிக் உள்ளவராக இருப்பின் உங்களுக்கென்று ப்ரத்யோகக் குழுவான இதில் சேர்ந்து உணவுப் பரிந்துரை  பெற்றுக்கொள்ளவும்.
--
இனி,
நாங்கள் எதற்கும் கட்டணம் வாங்குவதில்லை. தனியாக க்ளினிக் வைத்து  பேலியோ பரிந்துரை செய்வதில்லை. எங்களை சந்திக்கவேண்டிய அவசியம் உங்களுக்கு இல்லை. அனைத்துவிதமான தகவல்களும் குழுவில் இருக்கிறது. பொறுமையுடன் படித்துப் பார்த்தாலே போதுமானது. உங்களுக்கு அதற்கு மேலும் ஒரு மருத்துவர் தேவைப்பட்டால் முதலில் உங்கள் குடும்ப மருத்துவரிடம் கலந்தாலோசிக்கவும். அவருக்கு பேலியோ பற்றி தெரியாவிட்டால் குழுவை அறிமுகம் செய்யவும். உங்கள் உடல் உபாதைகளுக்கு பேலியோ என்பது உதவக் கூடிய உணவுமுறையாக இருந்தாலும், பேலியோ என்பது மருந்தோ, மருத்துவமோ அல்ல. உங்களுக்கு வரும் பிரச்னைகளுக்கு பேலியோ உணவுமுறையை சந்தேகப் பட்டு கேள்விகேட்காமல் உங்கள் மருத்துவரைச் சந்தித்து வைத்தியம் பார்க்கவும்.

பேலியோ முயற்சிக்கக்கூடாத மக்கள்:
ரத்தப் பரிசோதனை செய்யாமல் பேலியோ முயற்சிப்பவர்கள்.
நீண்டகால டயபடிக்கிற்கு / ப்ளட் ப்ரஷருக்கு சரியான வைத்தியம், மருந்துகள் உண்ணாமல் கிட்னிபிரச்னை இருப்பவர்கள்.
டயலிஸிஸ் செய்பவர்கள்.
ஓப்பன் ஹார்ட் சர்ஜரி, ஸ்டெண்ட் வைத்தவர்கள்.
பேலியோ பற்றி அடிப்படைப் புரிதல் இல்லாதவர்கள்.
வெறும் வெயிட்லாஸுக்காக அணுகுபவர்கள்.
படித்து புரிந்துகொள்ள நேரமும், பொறுமையும் இல்லாதவர்கள்.
பேலியோ பற்றிய குழு சார்ந்த புத்தகங்களும் விலைக்கு வாங்கக்கிடைக்கும்.
அவற்றை  www.paleocart.com என்ற தளத்தில் நீங்கள் வாங்கலாம். மேலே கூறப்பட்ட லிங்குகளில் உங்களுக்குத் தேவையான அனைத்து தகவல்களும் கிடைக்கும். காசு கொடுத்து புத்தகம் வாங்கவேண்டிய கட்டாயமில்லை. பேஸ்புக் தெரியாதவர்கள், வயதானவர்களுக்கு, மொபைல், கம்ப்யூட்டரில் படிக்க விருப்பமில்லாதவர்களுக்கு நீங்கள் புத்தகங்களை பயன்படுத்தச் சொல்லலாம். அல்லது மேலே உள்ள லிங்குகளிலிருந்து ப்ரிண்ட் அவுட் எடுத்து அதனைப் பயன்படுத்தலாம்.

இறுதியாக, குழுவில் உங்களுக்கு யார் மீதாவது புகார் இருந்தாலோ, உங்களை யாரேனும் இன்பாக்ஸில் தொந்தரவு செய்தாலோ, அனாவசியமாக எதையாவது விற்பனைசெய்ய அணுகினாலோ நீங்கள் புகார் அளிக்கவேண்டிய முகவரி:

neander2100@gmail.com

புகார்கள் ஆதாரப் பூர்வமானதாக இருப்பது அவசியம். உங்கள் ரகசியம் காக்கப்படும், மேலே உள்ள முகவரிக்கு டயட் சார்ட், பேலியோ சந்தேகங்கள் கேட்பது தவிர்க்கவேண்டும்.
டயட் துவங்கியவுடன் தினம் குழுவில் என்ன நடக்கிறது என்பதைப் படிக்கவேண்டும். தினம் சாப்பிடும் உணவுகளை ஒரு டைரியில் குறித்துவரவேண்டும். பரிந்துரைக்கப்பட்ட உணவுகளை சரியாக உண்ணவேண்டும். நடைப்பயிற்சி , சன்பாத் போன்றவைகள், சப்ளிமெண்ட்கள் முக்கியம். 

உங்கள் டோக்கன் எண், உங்கள் போஸ்ட் எப்படி சேமிப்பது போன்ற தகவல்கள் உங்கள் போஸ்டில் தரப்பட்டிருக்கும் கவனமாக அதை குறித்துக்கொண்டு மேலதிக சந்தேகங்களை இதே போஸ்டில் மட்டுமே கேட்கவும். உங்களுக்கு ஏற்படும் அனைத்து உடல் பிரச்னைகளுக்கும் உங்கள் மருத்துவரை மட்டும் அணுகவும். சிகிச்சை பெறவும். 

குழுவின் பின் போஸ்டை தவறாமல் படிக்கவும்:

https://www.facebook.com/groups/tamilhealth/permalink/743529282504220/


வாழ்க கொழுப்புடன்.

நன்றி.

பேலியோவுக்கு முன்பு நீங்கள் அறிந்துகொள்ளவேண்டியவை.. Before you try paleo..

வணக்கம்.

பேலியோ உணவுமுறையை எப்படியோ அறிந்துகொண்டு அதனை முயற்சிக்கும் முன்பாக நீங்கள் அறிந்துகொள்ளவேண்டிய சில முக்கிய விவரங்கள்.

இது ஒரு எளிய உணவுமுறை. ஆனால் இதன் சித்தாந்தம் நீங்கள் வழக்கமாக உண்ணும் முறைகள் மற்றும் அறிந்த ஆரோக்கியக் குறிப்புகளிலிருந்து வேறுபடும். அதனை முழுவதுமாக அறிந்துகொள்ள நீங்கள் எங்கள் குழுவின் புத்தகங்களைப் படித்து தெளிவாக அறிந்துகொள்ளவேண்டியது அவசியம்.

கீழுள்ள தளத்தில் ஆன்லைனில் இந்தப் புத்தகங்கள் விற்பனைக்குக் கிடைக்கும்.

www.paleocart.com 

இதை காசுகொடுத்து வாங்கினால்தான் உங்களுக்கு இந்த உணவுமுறையைப் பின்பற்றமுடியும் என்ற கட்டாயமில்லை. இவை அனைத்தும் எங்கள் பேஸ்புக் குழுவிலும் இலவசமாகப் படிக்கக் கிடைக்கும். ஆயிரக்கணக்கான பதிவுகளில் அவற்றைத் தேடுவது சிரமமாக இருக்கும் என்று கருதுபவர்களுக்கும், பேஸ்புக் பழக்கமில்லாதவர்களுக்கும், இந்த உணவுமுறையை புதியவர்களுக்கு அறிமுகப்படுத்த விரும்புபவர்களுக்கும் நாங்கள் புத்தகமாக வெளியிடுகிறோம்.

தமிழில் பேலியோ பற்றி விரிவாகவும் அறிவியல் ரீதியாகவும் எந்தக் கட்டணமுமின்றி இலவசமாக அறிந்துகொள்ள இருக்கும் ஒரே ஒரு பேஸ்புக் குழுமம் எங்கள் ஆரோக்கியம் & நல்வாழ்வுக் குழுமம் மட்டுமே. கீழுள்ள லிங்கில் நீங்கள் நுழைந்து எங்கள் குழுமத்தில் இணைந்து பேலியோ பற்றி முழுவதும் அறிந்து, தெளிந்து இந்த உணவுமுறையைப் பின்பற்றிப் பலனடையவும். எங்களுக்கு வாட்ஸப் துவங்கி வேறு எதிலும் கிளைகள், ஆலோசனைகள் இல்லை. 3 லட்சத்திற்கும் அதிகமான உறுப்பினர்களையுடைய எங்கள் குழும முகவரி கீழே.

www.facebook.com/groups/tamilhealth

குழுவில் நாங்கள் இந்த உணவுமுறைக்காக ரத்தப் பரிசோதனைகள் கட்டாயமாக்குகிறோம். கீழுள்ள மூன்று பரிசோதனை நிலையங்களில் நீங்கள் பேலியோ துவங்குவதற்கு முன்பான ரத்தப் பரிசோதனைகளை எடுக்கலாம். மிகக் குறைந்த விலையில் குழுவினருக்காக இந்த டெஸ்ட்கள் செய்து தருகிறார்கள். மீண்டும், இந்த லேபுகளில்தான் நீங்கள் டெஸ்ட் எடுக்கவேண்டும் என்பது கட்டாயமில்லை. நாங்கள் கேட்கும் டெஸ்ட்கள் அனைத்தையும் நீங்கள் உங்களுக்கு விருப்பப்பட்ட லேபுகளில் எடுக்கலாம்.

   







கொழுப்பு உணவுகள் ஆபத்தானவையா? ஒரு விளக்கம். By Neadner Selvan.


கொலஸ்டிரால் உடலுக்குக் கெடுதலா?

கொழுப்பு, நிறைவுற்ற கொழுப்பு (Saturated fat) போன்ற வார்த்தைகளைக் கேட்டாலே பலரும் பதறுவார்கள். அதிலும் முட்டை, சிகப்பு இறைச்சி (Red meat), பன்றிக்கொழுப்பு, வெண்ணெய் என்றால் அவ்வளவுதான். உடனே வரும் கேள்வி இவற்றைச் சாப்பிட்டால் மாரடைப்பு வரும் அல்லவா?’
சிகப்பு இறைச்சியும், நிறைவுற்ற கொழுப்பும் இதயத்துக்குக் கெடுதலானவை என்று பலரும் நினைப்பது நம் இதயத்துக்குத் தெரிந்தால், விழுந்து விழுந்து சிரிக்கும். ஏன் எனில், நம் இதயமே மிகப்பெரிய சிகப்பு இறைச்சித் துண்டுதான். முழுக்க முழுக்க சிகப்பு இறைச்சியாலும், நிறைவுற்ற கொழுப்பாலும் ஆனதுதான். இதயம் மட்டுமல்ல, மனித உடலே அப்படித் தான். அதிலும் மனித மூளை என்பது மிகப்பெரிய கொலஸ்டிரால் பந்து. உள் உறுப்புக்களில் மிக அதிக அளவில் கொலஸ்டிராலைத் தேக்கி இருக்கும் மனித உறுப்பு, மூளையே. வேறு எந்த உறுப்புக்களை விடவும் பத்து மடங்கு அதிக கொலஸ்டிரால் நம் மூளையில் உள்ளது.
கொலஸ்டிரால் நம் தோழன். அதிலும் உற்ற தோழன். நம் உயிர் காத்து, ஆண்களுக்கு ஆண்மையையும், பெண்களுக்குப் பெண்மையையும் அளித்து, மாரடைப்பின் பிடியில் இருந்து நம்மைக் காக்கும் தோழன். கர்ணனுக்கு துரியோதனன் போல, அவ்வைக்கு அதியமான் போல, அர்ஜுனனுக்கு கிருஷ்ண பரமாத்மா போல நமக்கு உற்ற நண்பன். கொலஸ்டிரால் இல்லையென்றால் நாம் இல்லை, நம் சந்ததி இல்லை, மனித இனம் மட்டுமல்ல, பாலூட்டிகள் என்கிற இனமே இல்லை.
கொலஸ்டிரால் என்பது பசை மாதிரி உள்ள ஒரு வகைப் பொருள். பலரும் நினைப்பது போல அதில் கலோரி எல்லாம் கிடையாது. கொலஸ்டிரால் உடலுக்குத் தேவையான மிக, மிக முக்கியமான ஒரு மூலப்பொருள். நம் உடல் இயங்க பல ஹார்மோன்கள் அவசியமானவை.
உதாரணமாக ஆண்களுக்கு ஆண்மையை அளிப்பது டெஸ்டோஸ்டிரான்  (Testosterone) எனும் ஹார்மோன். இந்த ஹார்மோன்தான் உயிர் அணுக்களை உற்பத்தி செய்யத் தூண்டுகிறது. ஆண்களுக்கு முடி வளர்வது முதல் விந்தணு உற்பத்தி வரை அனைத்துக்கும்  மூலக்காரணி டெஸ்டோஸ்டிரான் தான். ஆண்களுக்கு வலிமையை அளிப்பதும் இதுதான். அதனால்தான் பெண்களை விட ஆண்களுக்கு அதிக உடல் வலு உள்ளது.
பெண்களுக்குப் பெண்மையை அளிப்பது ஈஸ்ட்ரோஜென் (Estrogen) எனும் ஹார்மோன். ஈஸ்ட்ரோஜெனால்தான் பெண்கள் வயதுக்கு வருகிறார்கள், மார்பக வளர்ச்சியைப் பெறுகிறார்கள். பெண்களுக்கு, கருமுட்டை வளர்ச்சிக்கு ஈஸ்ட்ரோஜென் ஹார்மோன் அவசியம்.
கொலஸ்டிராலுக்கும் ஹார்மோன்களுக்கும் இடையே உள்ள உறவு வெண்ணெய்க்கும், நெய்க்கும் இடையே உள்ள உறவு போன்றது. அதாவது உடலால் உற்பத்தி செய்யப்படுகிற அனைத்து ஹார்மோன்களுக்கான மூலப்பொருளே கொலஸ்டிரால்தான். உடலில் வேறு எந்த மூலப்பொருள் தட்டுப்பாடு வந்தாலும் ஓரளவு சமாளிக்க முடியும். ஆனால், கொலஸ்டிரால் உற்பத்தி மட்டும் தடைபட்டால் அவ்வளவுதான். பல ஹார்மோன்களின் உற்பத்தி நின்று, உடலே ஸ்தம்பித்துவிடும்.
இத்தனை முக்கிய மூலப்பொருளான கொலஸ்டிராலை, நம் உடல் தானே தயாரித்துக்கொள்ளும் வல்லமையைப் பெற்றுள்ளது. நம் உடலின் ஒவ்வொரு செல்லுக்கும் கொலஸ்டிராலை உற்பத்தி செய்யும் சக்தி உள்ளது. இருப்பினும் நமக்குத் தேவையான கொலஸ்டிராலை நம் உணவு மூலமாகவும் பெறலாம். அதாவது இறைச்சி, முட்டை, பால், மீன் போன்ற உணவுகளில் கொலஸ்டிரால் உண்டு. அதே சமயம் எந்த ஒரு தாவர உணவிலும் கொலஸ்டிரால் கிடையாது.
உடலில் உள்ள ஒவ்வொரு செல்லுக்குள் உள்ள சவ்வை (Membrane) உற்பத்தி செய்ய கொலஸ்டிரால் அவசியமாகிறது. மேலும், ஒவ்வொரு செல்லிலும் நீர் புகாதபடி, ‘வாட்டர் ஃப்ரூப்ஆக செல்களைக் காப்பாற்றுகிறது. கொலஸ்டிரால் இல்லையெனில் ஈஸ்ட்ரோஜென் (Estrogen), புரோஜெஸ்டிரான் (Progesterone), டெஸ்டோஸ்டிரான் (Testosterone), அட்ரினலின் (Adrenaline), கார்ட்டிசோல் (Cortisol) ப்ரக்னனோலோன் (Pregnenolone) போன்ற ஹார்மோன்கள் மற்றும் வைட்டமின் டி போன்றவை நம் உடலில் உற்பத்தி ஆகாது.
இதனால் நம் உடல் கொலஸ்டிராலை உற்பத்தி செய்ய அதிக முயற்சி எடுக்கிறது. இத்தனை பணிகளுக்கும் தினமும் 2000 மி.கி. கொலஸ்டிரால் தேவை. அதனால், கல்லீரல் (Liver) நம் உணவில் இருந்து கொலஸ்டிராலை உற்பத்தி செய்வதில் பெரும் ஆற்றலையும், நேரத்தையும் செலவழிக்கிறது.
உணவில் இருந்து கொலஸ்டிராலை நம் உடல் உற்பத்தி செய்வது எளிதான காரியம் அல்ல. அது 30 படிகள் கொண்ட ஒரு வழிமுறை. இதைச் செய்வதால் கல்லீரலுக்கு அதிக வேலை. அதற்குப் பதிலாக, உணவின் மூலமாகவே நம் உடலுக்கு கொலஸ்டிரால் கிடைத்துவிட்டால்? கல்லீரலுக்கு அதிக ஓய்வு கிடைக்கும் இல்லையா! இதனால் அது புரதத்தை ஜீரணம் செய்தல், பைல் ஆசிட் (Bile acid) எனப்படும் ஜீரண ஆசிட்டை உற்பத்தி செய்தல் போன்ற வேறு வேலைகளில் ஈடுபடும்.
ஆக, எத்தனைக்கு எத்தனை கொலஸ்டிரால் நம் உணவில் அதிகமாக இருக்கிறதோ அத்தனைக்கு அத்தனை நம் கல்லீரல் ஆரோக்கியமாகவும், நீண்ட ஆயுளுடனும் இருக்கும்.
உணவின் வழியாக கல்லீரலுக்கு கொலஸ்டிராலைக் கொடுப்பது என்பது தினமும் ஐந்து மணிநேரம் கையால் துணி துவைக்கும் இல்லத்தரசிக்குச் சலவை இயந்திரம் வாங்கிக் கொடுப்பது மாதிரி.
நம் உடலில் உற்பத்தி செய்யப்படும் கொலஸ்டிராலுக்கும் முட்டை, இறைச்சி, வெண்ணெய் போன்றவற்றில் இருந்து கிடைக்கும் கொலஸ்டிராலுக்கும் துளி வேறுபாடு கிடையாது. இரண்டும் ஒன்றே. முட்டையில் உள்ள கொலஸ்டிரால் உடலுக்குக் கெடுதல் என்று சொன்னால், நம் கல்லீரல் மாங்கு மாங்கு என்று உற்பத்தி செய்யும் கொலஸ்டிராலும் கெடுதலானது என அர்த்தம் வரும் இல்லையா? உடலுக்குக் கெடுதல் விளைவிக்கும் பொருளை எதற்காக நம் கல்லீரல் உற்பத்தி செய்யவேண்டும்? கொஞ்சம் யோசியுங்கள்.
நம் உடலுக்குத் தினமும் தேவைப்படும் கொலஸ்டிரால் அளவு - 2000 மிகி. அதாவது கிட்டத்தட்ட பத்து முட்டைகளில் உள்ள அளவு. தினமும் எட்டு முட்டைகள் சாப்பிட்டால், நம் கல்லீரலுக்குச் சுமார் 1600 மி.கி. கொலஸ்டிராலை உற்பத்தி செய்யும் வேலை மிச்சம் ஆகும். மீதமுள்ள நானூறு மி.கி. கொலஸ்டிராலை மட்டும் அது உற்பத்தி செய்துவிட்டு ஹாயாக ஓய்வெடுக்கும். எனவே, கொலஸ்டிரால் உள்ள உணவுகளை உண்டால் ஆபத்து என்று எச்சரிப்பதில் எந்த அர்த்தமும் இருக்கமுடியாது இல்லையா?
ஒரு அமெரிக்கருக்கு அவரது உணவின் மூலம் தினமும் 400 மி.கி. அளவுள்ள கொலஸ்டிரால் கிடைக்கிறது (அமெரிக்க அரசின் பரிந்துரை 300 மி.கி.). இந்திய அரசு, உணவில் தினமும் 365 மி.கி. மட்டுமே கொலஸ்டிரால் இருக்கவேண்டும் எனப் பரிந்துரை செய்கிறது. இந்தப் பரிந்துரைகள் அபத்தமானவை.


Tuesday, August 8, 2017

சக்தி கொடு! - 11 சிவராம் ஜெகதீசன்

ஆரோக்கிய வாழ்வுக்கான வைட்டமின்களும் மினரல்களும்********************************
வைட்டமின் B3 (Niacin and Niacinamide)***************************
வைட்டமின் B3 என்பது நியாசினும் (அல்லது நிகோடினிக் ஆசிட்) அதன் வழித்தோன்றலான நியாசினமைடும் சேர்ந்ததாகும். தையமினுடனும் (B1) ரிபோபிளேவிடனும் (B2) சேர்ந்து நியாசினும் உடலுக்குத் தேவையான ஒரு முக்கியமான மைக்ரோ நியூட்ரியண்ட்டாகும். ஆனால் நியாசினுக்கும் மற்ற தையமின் அல்லது ரிபோஃபிளேவினுக்கும் உள்ள முக்கிய வித்தியாசம் என்னவென்றால், நியாசின் அதிக டோசேஜ் எடுத்தால் கடுமையான பின்விளைவுகள் ஏற்படும்.
நியாசின் இதயக் கோளாறுகளை உருவாக்கவல்ல ரத்த கொழுப்புகளைக் கட்டுப்படுத்தும் ஒன்றாகும். HDL எனப்படும் நல்ல கொலஸ்டிராலை அதிகப்படுத்துவதிலும், டிரைகிளிசரைட்ஸ் எனப்படும் கெட்ட கொழுப்பைக் குறைப்பதிலும் நியாசின் உதவி செய்து இதயத்தைப் பாதுகாப்பதில் முக்கியப்பங்கு வகிக்கிறது. மேலும் இது சொரியாசிஸ் நோயைத் தணிப்பதிலும் முக்கியப் பங்காற்றுகிறது. வைட்டமின் A வைப் போலவே பல வடிவங்களில் உள்ளது. நியாசின் சப்ளிமெண்டுகள் என்று வரும் போது அவை நிகோடினிக் ஆசிட் மற்றும் நியாசினமைட் மற்றும் Inositol Hexaniacinate என்ற மூன்று வடிவங்களில் கிடைக்கிறது. இவற்றில் நிகோடினிக் ஆசிட் ரத்தத்தில் உள்ள கொழுப்பைக் கட்டுப் படுத்துவதற்கும் ரத்த நாளங்களைத் தளர்த்துவதற்கும் உதவுகிறது.
வைட்டமின் பி குழுமத்தில் மூன்றாவதாகக் கண்டு பிடிக்கப்பட்ட வைட்டமின் இது. அதனாலேயே B3 என்று பெயரிடப்பட்டது. இதயத்தின் ஆரோக்கியமான செயல்பாட்டுக்கும் கொழுப்பின் வளர் சிதை மாற்றத்திற்கும் நியாசின் ஒரு முக்கியமான வைட்டமினாகும். இத்துடன் மூளை செயல்பாடு, ஆரோக்கியமான தோல் மற்றும் நீரிழிவைக் கட்டுப்படுத்துவதிலும் பங்கு வகிக்கிறது.
நீரிழிவு நோயைக் கட்டுப் படுத்தும் மருந்துகளின் செயல்பாட்டை நியாசின் மேம்படுத்துகிறது. சிலருக்கு சூரிய ஒளியில் போனாலே தோலில் அரிப்பு, சொறி மற்றும் சன் பர்ன் எனப்படும் கொப்புளங்கள் தோன்றும். தோலில் வெடிப்புகள் ஏற்பட்டு இன்ஃபெக்‌ஷன் கூட ஆகும். இதற்கான சிகிச்சைக்கு நியாசின் பயன்படுகிறது. எவ்வளவு லோஷன்களைப் போட்டாலும் நியாசின் குறைபாடு இருந்தால் தோலில் ஏற்படும் வெடிப்புகளை லோஷன்கள் சரி செய்ய முடியாது. ஏனெனில் உள்ளே இருக்கும் வைட்டமின் குறைபாட்டை லோஷன்களைத் தடவுவதன் மூலம் சரி செய்ய முடியாது.
மூப்பின் (வயதாவதன்) காரணமாக வரும் அல்சைமர் வியாதி, ஞாபக சக்திக் கோளாறு, மைக்ரேன் தலைவலி, மன அழுத்தம், மோஷன் சிக்னஸ் எனப்படும் பிரயாணம் செய்யும்போது ஏற்படும் அசௌகர்யம், தூக்கமின்மை போன்றவற்றைக் குணப்படுத்தவும் நியாசின் உதவுகிறது. மைக்ரேன் தலை வலியை உணர ஆரம்பிக்கும் போதே நியாசின் மாத்திரை ஒன்றை எடுத்துக் கொள்வது மைக்ரேன் தலைவலியை உடனடியாக நிறுத்தவும் செய்யும். சீஸோஃபெர்னியா எனப்படும் தெளிவாக செயல்படாத தன்மை, ஹல்லூசினேஷன் (பிக் பாஸ் ஜூலிக்கு இருந்த பல வியாதிகளில் ஒன்று - நடக்காததை நடந்ததாக நம்புவது) போன்ற மன நலக் குறைபாடுகளுக்கும் நியாசின் மருந்தாகிறது.
இந்த வொண்டர் வைட்டமின் நியாசின், நியாசினமைட் என்ற வடிவத்தில் ஆர்த்திரிடிஸ் நோயால் வரும் வலி மற்றும் தசைகளின் ஸ்டிஃப்னஸ் எனப்படும் கெட்டிப்பட்ட தன்மையைக் குறைப்பதிலும் உதவி செய்கிறது. அதிக டோசேஜில் பரிந்துரைக்கப்படும் நியாசின், ஆர்த்திரிடிஸால் ஏற்படும் வீக்கத்தைக் குறைத்து, ஆர்த்திரிடிஸ் வலிக்கு, வலி மாத்திரைகள் எடுப்பதைக் குறைக்கவும் உதவுகிறது. இந்த நியாசினானது உள்காயத்தை ஆற்றி எலும்புகள் மற்றும் மூட்டுகளில் ஏற்படும் வலியைக் குறைக்கிறது. வைட்டமின் பி குறைவால் ஏற்படும் பெல்லக்ரா (Pellagra) என்ற நிலையைச் சரி செய்கிறது.
பெல்லக்ரா என்ற நிலை பொதுவாக சத்தான உணவுகள் எடுத்துக் கொள்ளாதது மற்றும் அதிக பட்ச குடிப்பழக்கம் உள்ளவர்களுக்கு வரும் ஒரு நிலையாகும். பெல்லக்ரா நிலை ஒரே இரவில் ஏற்படுவதில்லை. ஆரம்ப கட்ட சப்-கிளினிகல் நிலை என்பது வயிற்று உபாதைகளில் ஆரம்பிக்கும். இதற்கு முக்கியக் காரணம், அடிக்கடி அதிகமான ஆண்டிபயாடிக் எடுத்தல், குடிப்பழக்கம் போன்றவற்றால் வயிற்றுப் பகுதியில் இருக்கும் லைனிங் சிதைக்கப் பட்டு வைட்டமின்களை உடல் கிரகிக்க முடியாததே. இதற்கு மருத்துவர் உதவியுடன் அதிகமான டோஸ்களில் நியாசினமைட் எடுத்துக் கொள்வது மிகுந்த பலனைத் தரும்.
இவை அனைத்தைக் காட்டிலும் முக்கியமாக, நியாசின் கேன்சரை வர விடாமல் தடுப்பதிலும் முக்கியப் பஙங்காற்றுகிறது.
எரெக்டைல் டிஸ்ஃபங்ஷன் எனப்படும் ஆணுறுப்பு விறைப்படையாத நிலையை மாற்றவும் நியாசின் உதவி செய்கிறது. மருத்துவர் உதவியுடன் நியாசினை 250 மில்லி கிராம் அளவில் தினமும் மூன்று முறை எடுப்பது சரியான ரத்த ஓட்டத்தை ஆணுறுப்புக்குள் அளிக்கிறது. இதன் மூலமாக எரெக்டைல் டிஸ்ஃபங்ஷன் காரணமாக சரி செய்யப்படுகிறது.
நியாசின் எடுப்பதன் பக்க விளைவுகள் பின் வருமாறு:
. சாப்பிட ஆரம்பிக்கும் போது தோலில் சிகப்பு நிற பேட்ச்கள்
. வயிறு உபாதைகள்
. தோல் வறண்டு போதல்
மேற்கண்ட விளைவுகள் சில வாரங்களில் தானாகவே சரியாகி விடும். நியாசின் எடுப்பதற்கு 30 நிமிடங்களுக்கு முன்னால் ஆஸ்பிரின் எடுப்பது இது போன்ற பக்க விளைவுகளைக் குறைக்கும்.
மிக அதிக டோசேஜ்களில் எடுக்கும் நியாசின் ஈரலைச் சேதமாக்கும். மேலும் பெப்டிக் அல்சரையும் ரத்தத்தில் அதிக யூரிக் ஆசிட் அளவுகளைக் கொடுக்கும். வைட்டமின் பி குடும்பத்தில் உள்ள மற்ற வைட்டமின்களைச் சேர்த்து எடுக்காமல் நியாசினை மட்டும் எடுப்பது உங்கள் ரத்த ஹோமோசிஸ்டைன் அளவுகளை அதிகமாக்கி இதயக் கோளாறுகளுக்கு அடிகோலும். மேலும் ஞாபசக்திக் குறைபாட்டையும் உருவாக்கும். மேலும் ரத்த கொலஸ்டிரால் அளவுகளைக் குறைக்கும் ஸ்டாடின் மருந்துகளுடன் சேரும் போது rhabdomyolysis எனப்படும் தசைகள் சேதத்தை விளைவிக்கும். அதனால் தகுந்த மருத்துவரின் மேற்பார்வையில் மட்டுமே நியாசின் சப்ளிமெண்ட்டை எடுக்க வேண்டும்.
உங்களுக்கு நியாசின் குறைபாடு இருந்தால் கீழ்க்கண்ட அறிகுறிகள் உடலில் தோன்றும்:
. தலைவலி
. மன அழுத்தம்
. உடலில் நச்சுப் பொருட்களை வெளியேற்ற முடியாமை (நியாசின் ஒரு வலிமையான ஆண்டி டாக்சின். மேலும் நியாசினமைடானது, சேதப்பட்ட செல்களைச் சுத்தப்படுத்துவதிலும் உதவுகிறது.)
. ஜீரணக் கோளாறுகள்
. தூக்கமின்மை
. தசைகள் வலுவிழத்தல்
. எரிச்சலான மன நிலை
. வாய்ப்புண்கள்
செல்களின் வளர் சிதை மாற்றத்திற்குத் தேவையான இரண்டு முக்கியமான கோ என்சைம்களின் செயலில் நியாசின் முக்கியப் பங்காற்றுகிறது. செல்களுக்கு இடையே பரிமாறிக் கொள்ளப்படும் சமிக்ஞைகளிலும் டி என் ஏ மூலக்கூறுகளை பழுது பார்ப்பதிலும் நியாசினின் தேவை உள்ளது.
கீழ்க்கண்ட உணவுகளில் நியாசின் வைட்டமின் உள்ளது:
. ஈரல்
. கிட்னி
. கோழி, ஆடு மற்றும் சிவப்பிறைச்சிகள்
. மீன்கள்
. முட்டை
. சிகப்பு மிளகாய்
. பாதாம்
மேற்கண்ட உணவுகளை உண்ணும் போது உடலுக்குத் தேவையான நியாசின் உணவின் மூலமே முழுமையாகக் கிடைக்கும். அப்படி உணவின் மூலம் கிடைக்காமல் போனாலோ அல்லது உண்ட உணவிலிருந்து நியாசினை உடலால் உபயோகப் படுத்த முடியாமல் (குடிப்பழக்கம் இருந்தால் நியாசினை குடலால் பிரித்தெடுக்க முடியாது) போனாலோ உங்களுக்கு நியாசின் சப்ளிமெண்டுகள் தேவை. சப்ளிமெண்டுகள் மூலம் கீழ்க்கண்ட நோய்க்குறிகளைக் குணப்படுத்த நியாசின் உபயோகப் படுகிறது:
. முகப்பரு
. மன அழுத்தம்
. நீரிழிவைக் கட்டுப்படுத்துதல்
. அதிக ரத்த கொலஸ்டிரால் அளவுகள்
. அதிக ரத்த டிரைகிளிசரைட் அளவுகள்
. ரத்த ஓட்டம் பாதிப்பதால் வரும் வலி
. ஆஸ்டியோ ஆர்த்திரிடிஸ்
. ருமடாய்ட் ஆர்திரிடிஸ்
. பார்கின்சன்ஸ் டிசீஸ் எனப்படும் மத்திய நரம்பு மண்டலக் கோளாறுகள்
இந்த நியாசின் வைட்டமினின் பரிந்துரைக்கப்பட்ட தினசரி டோசேஜ் 20 Mg.
முதல் முறையாக நியாசின் எடுக்கும் போது ஃபிளஷ் என்று சொல்லப்படும் தோலில் சிவப்பு நிற பேட்ச்கள் ஏற்படும் என்று பார்த்தோம். அப்படி முதல் முறையாக நியாசின் எடுக்கும் போதும் உடலுக்கு ஏற்படும் அதிர்ச்சியால் அது வருகிறது. இதை நியாசின் ஃபிளஷ் என்று அழைப்பார்கள். இது தாங்கிக் கொள்ளக் கூடியதே. ஆனால் அதன் பின்னர் ஒரு தெளிவான மன நிலையயும், மூளைப் பகுதியில் ஒரு சுறு சுறுப்பையும், உடலுக்கு சக்தி கிடைப்பதையும் உணர முடியும். அதாவது உடலின் சக்தி நிலைகளை நியாசின் சரியன விதத்தில் மேம்படுத்துகிறது.
நீங்கள் நீரிழிவு, இதயக் கோளாறுகள், தைராய்ட் போன்றவற்றுக்கு மருந்துகள் எடுத்துக் கொண்டிருந்தால் நியாசின் அந்த மருந்துகளின் செயல்பாட்டில் தலையிட்டு வேண்டாத விளைவுகளை ஏற்படுத்தும். இந்த மருந்துகளை நீங்கள் எடுத்துக் கொண்டிருந்தால் மருத்துவர் ஆலோசனை இல்லாமல் நியாசின் வைட்டமினை எடுப்பது தவறு.

சக்தி கொடு! - 10 சிவராம் ஜெகதீசன்

வைட்டமின் B2
*************
வைட்டமின் B2 அல்லது ரிபோஃப்ளேவின் என்ற வைட்டமின், உடலின் சக்தி உருவாக்கும் செயல்பாட்டிலும், ஆண்டிபாடீஸ் எனப்படும் நோயெதிர்ப்பு செல்கள் உருவாக்கத்திலும், ஆரோக்கியமான கண்களுக்கும், திசுக்கள் சேதாரத்தைப் பழுது பார்ப்பதிலும் முக்கியப் பங்கு வகிக்கிறது.
B2 வைட்டமின், உடலில் கொழுப்பு சேராமல் தடுப்பதிலும், ஆண்ட்டி ஆக்சிடண்ட்டாகச் செயல்பட்டு கேன்சர் போன்ற நோய்கள் வராமல் காப்பதிலும், தீங்கு விளைவிக்கும் ஃபிரீ ராடிகல்களுக்கு இன்னொரு எலெக்டிரானைக் கொடுத்து அதை நடு நிலைப்படுத்துவதாகவும் ஆராய்ச்சிகள் சொல்கின்றன.
வைட்டமின் B2, மூளையின் செல்களில் உள்ள சிறிய குறைபாடுகளை நீக்குவதன் மூலம் மைக்ரேன் எனப்படும் ஒற்றைத் தலைவலியைக் குணப்படுத்துவதில் பங்கு வகிக்கிறது. மேலும் ஹோமொசிஸ்டைன் என்ற அமினோ அமிலத்தை உடைப்பதன் மூலம் இதயத்தையும் பாதுகாக்கிறது. இந்த ஹோமோசிஸ்டைன் ரத்தத்தில் அதிகமாக இருக்கும் பட்சத்தில் இதய நோய்களும், ஏன் ஸ்டிரோக் என்று சொல்லப்படும் பக்கவாதமும் வரலாம். மேலும் காடராக்ட் எனப்படும் கண்புரை வராமல் காப்பதிலும் வைட்டமின் B2 பங்கு வகிக்கிறது.
ஃபோலேட் மற்றும் வைட்டமின் B6 உடலுக்குத் தேவையான வேதிப் பொருளாக மாற்றப்பட ரிபோபிளேவின் அவசியம் தேவை. அமினோ அமிலங்களை, வைட்டமின் B2 நியூரோ டிரான்ஸ்மிட்டர்களாக மாற்றி சிந்தனைச் செயல்பாட்டுக்கும் ஞாபக சக்திக்கும் உதவுகிறது. தசைகளின் சக்திக்கு உதவுவதால், விளையாட்டு வீரர்களுக்கு இன்றியமையாத ஒன்றாகும்.
உண்ட உணவான கொழுப்பு - புரதம் - கார்போஹைடிரேட்டில் இருந்து சக்தியை பிரிப்பதற்கு வைட்டமின் B2 முக்கியத் தேவை. இந்த அடிப்படைச் செயல்பாடு உடலின் ஒவ்வொரு செல்லுக்கும் தேவை. அதனால் இந்த தண்ணீரில் கரையக் கூடிய வைட்டமினை சரிவிகித உணவு எடுப்பதன் மூலம் ஒவ்வொரு நாளும் உடலில் நிரப்பிக் கொண்டே இருக்க வேண்டும்.
தையமினைப் போலவே (B1), ரிபோபிளேவினும் உடலின் முக்கிய லீடர் நியூட்ரியண்ட்டாகும்.
இந்த வைட்டமின் B2 குறைபாடு கீழ்க்கண்ட நோய் அறிகுறிகளைத் தோற்றுவித்து உடலின் பல பகுதிகளைப் பாதிக்கும்.
. ஒளியைக் கண்டால் கண்கள் கூசுவது இந்த வைட்டமினின் குறைபாடுகளில் முக்கியமான ஒன்றாகும்
. கண்களில் அரிப்பு
. கண்களில் நீர் வடிதல்
. கண்களில் ரத்தத் திட்டுகள்
. மையோபியா எனப்படும் தூரத்தில் இருக்கும் பொருட்களைக் காண முடியாமை
. உதடு மற்றும் உதட்டோரங்களில் வெடிப்பு
. பாதங்களில் வெடிப்பு
. ரத்தத்தில் அதிக ஹோமோசிஸ்டைன்
. ரத்த சோகை
. மைக்ரேன் தலைவலி
. தைராய்டு செயல்பாடு பிறழ்ச்சி
. வளர்சிதை மாற்றம் தொய்வடைதல்
. மூக்கின் பக்க வாட்டில் எண்ணெய் பசை போல ஏற்படுதல்
. சைனஸ்
. மூக்கு மற்றும் விதைப்பைகளில் ஏற்படும் அரிப்பு மற்றும் தோல் உரிதல்
. வாய் மற்றும் நாக்கில் வீக்கம்
. தொண்டைப் புண்
. சளிச் சவ்வுகளில் வீக்கம்
. மன அழுத்தம் மற்றும் பதட்டமான மனநிலை
இந்த B2 வைட்டமின் அதிக டோசேஜ் ஆக பொதுவாக வாய்ப்பில்லை. அதனால் அதிக டோஸால் ஏற்படும் விளைவுகளுக்கு விரிவான விளக்கம் இல்லை.
ரிபோஃபிளேவின் வைட்டமின் கீழ்க்கண்ட உணவுப் பொருட்களில் உள்ளது.
. ஈரல்
. மீன்
. கிட்னி
. பாதாம்
. புல் உண்ணும் கால்நடைகளின் பாலில் எடுக்கப்படும் சீஸ்
. புல் உண்ணும் விலங்களின் மாமிசம்
. காளான்
. முட்டை
. மிளகாய்
. ப்ரோக்கோலி
உடலின் கீழ்க்கண்ட செயல்பாடுகளுக்கு வைட்டமின் B2 தேவை:
. கொழுப்பு - புரதம் - கார்போஹைடிரேட் வளர்சிதை மாற்றம்
. மருந்துகள் வளர் சிதை மாற்றம்
. உடலின் சக்தி தயாரிப்பு
. குளூடாதியோன் (Glutathione) எனப்படும் உடலால் தயாரிக்கப்படும் ஆண்டி ஆக்சிடண்ட் மறு தயாரிப்பு
. வைட்டமின் B6, ஃபோலிக் ஆசிட், வைட்டமின் A மற்றும் நியாசின் போன்ற வைட்டமின்களை ஆக்டிவ் வடிவத்துக்கு மாற்றுதல்.
கீழ்க்கண்டவை வைட்டமின் B2 உடலால் கிரகிக்கப் படுவதைத் தடுக்கும்.
. ஆல்கஹால்
. காப்பர்
. ஆண்டாசிட்டுகள்
. வைட்டமின் B3 மற்றும் C
. தியோஃபிலின் எனப்படும் ஆஸ்த்மா மருந்து
. ஆண்டிபயாடிக்குகள்
. கவுட் எனப்படும் கீல்வாதத்துக்கு எடுக்கும் மருந்துகள்
இந்த வைட்டமின் B2 வின் தினசரி பரிந்துரைக்கப் பட்ட அளவு பின் வருமாறு:
பிறந்த குழந்தைகள் முதல் 6 வயது வரை - 0.4 முதல் 1.0 மில்லி கிராம்
7-10 வயது - 1.4 மிகி
11-14 வயது - 1.6 மிகி
15-22 வயது - 1.7 மிகி
ஆண்கள் 23-50 வயது வரை - 1.6 மிகி
ஆண்கள் 51 வயதுக்கு மேல் - 1.4 மிகி
பெண்கள் 11-22 வயது - 1.3 மிகி
பெண்கள் 23 வயதுக்கு மேல் - 1.2 மிகி
கர்ப்பிணிகளுக்கு - 1.5 - 1.6 மிகி
பாலூட்டும் தாய்மார்களுக்கு - 1.7-1.8 மிகி
வைட்டமின் B2 வைத் தேவையான அளவுகளில் எடுத்து உடல் ஆரோக்கியம் காப்போம்.

சக்தி கொடு! - 9 சிவராம் ஜெகதீசன்


ஆரோக்கிய வாழ்வுக்கான வைட்டமின்களும் மினரல்களும்
********************************
வைட்டமின் B காம்ப்ளக்ஸ்***********************
வைட்டமின் B காம்ப்ளக்ஸ் என்ற உடலின் வளர்சிதை மாற்றத்திற்குத் தேவையான, சக்தியை உடலுக்குக் கொடுப்பதில் முக்கியப் பங்கு வகிக்கும், உடல் நலத்துக்கும் மன நலத்துக்கும் முக்கியக் காரணமான வைட்டமினைப் பற்றிப் பார்ப்போம்.
இந்த வைட்டமின் B என்பது கீழ்க்கண்ட 11 வகையான B வைட்டமின்களின் தொகுப்பு. அனைத்து B வைட்டமின்களை சேர்த்து பி காம்ப்ளக்ஸ் என்று அழைக்கிறார்கள்.
. B1 தையமின் (Thiamine)
. B2 ரிபோஃப்ளேவின் (Riboflavin)
. B3 நியாசின் மற்றும் நியாசினமைட் (Niacin and Niacinamide)
. B5 பேண்டோதெனிக் ஆசிட் (Pantothenic acid)
. B6 பைரிடாக்சின் (Pyridoxine)
. B7 பயோட்டின் (Biotin)
. B9 ஃபோலிக் ஆசிட் (Folic acid)
. B10 பாரா-அமினோபென்சாயிக் ஆசிட் (Para-aminobenzoic acid)
. B12 கோபாலமின் (Cobalamin)
. கோலின் Choline
. ஐனோசிடால் Inositol
இவையல்லாமல் B17 போன்ற வகை வைட்டமின்களும் உள்ளன.
பொதுவாக இந்த பல வகையான வைட்டமின் B க்கள் அனைத்தும் உண்ணும் உணவில் சேர்ந்து கலந்தே உள்ளது. இது ஒரு தண்ணீரில் கரையக்கூடிய வைட்டமின் வகையாகும். இவை பெரும்பாலும் உடலில் சேமித்து வைக்கப்படாமல் உடலால் வெளியேற்றப் படும். அதனால் உடல் இந்த வைட்டமின் சப்ளிமெண்டுகளை அதிக பட்சம் உபயோகிக்க இரண்டு வேளையாக எடுப்பது நல்ல பலனைத் தரும். அதாவது ஒரு நாளுக்கு 1000 மில்லி கிராம் வைட்டமின் எடுக்க வேண்டும் என்றால் காலையில் 500மிகி இரவில் 500மிகி என்று எடுக்க வேண்டும்.
எஸ்டிரோஜன் தெரபி மற்றும் குழந்தைப் பிறப்பைக் கட்டுப் படுத்தும் மருந்துகள் - போன்ற ஹார்மோன்களைச் சரி செய்யும் மருந்துகள் எடுக்கும் போது உடலுக்கு வைட்டமின் B அதிகம் தேவைப்படும். ஆண்டிபயாடிக்குகள் எடுக்கும் போதும் கூடவே வைட்டமின் பி12 மாத்திரை ஒன்றை எடுக்க வேண்டும். பெரும்பாலும் நீரிழிவு வியாதிக்காரர்கள் அனைவரும் வைட்டமின் B12, B1 அல்லது பி காம்ப்ளக்ஸ் மாத்திரைகளை எடுப்பது தவறில்லை என்றாலும், ரத்தப் பரிசோதனையில் வைட்டமின் B பரிந்துரைக்கப்பட்ட அளவை விட அதிகமாக இருந்தால் உடனடியா நிறுத்தவோ அல்லது டோசேஜ் குறைக்கவோ வேண்டும்.
வைட்டமின் B யானது, ஈரலின் செயல்பாட்டுக்கு உதவி செய்வது, கால்கள் மரத்துப் போதல் பிரச்சினையைச் சரி செய்வது, தைராய்ட் சுரப்பியின் செயல்பாட்டுக்குக்கு உதவுவது, மூளையின் வேதிச் செயலின் ஸ்திரத்தன்மைக்கு உதவுவது, புரதம்-கொழுப்பு-மாவுச்சத்துகளை உடல் சக்தியாக மாற்றும் வளர்சிதை மாற்றத்தில் உதவுவது போன்ற உடலின் முக்கியச் செயல்களுக்குக் காரணமாகிறது.
வைட்டமின் பி குறைபாட்டால், பசியின்மை, எரிச்சலான மனப்பான்மை, நோயெதிர்ப்பு சக்தியின்மை, தூக்கமின்மை, சர்க்கரை மீதான ஏக்கம் (Sugar Cravings), நரம்பு மண்டலப் பிரச்சினைகள் போன்றவைகள் ஏற்படும்.
வைட்டமின் B1 - தையமின்
***********************
இப்போது வைட்டமின் பி தொகுப்பில் உள்ள முதல் வைட்டமினான B1-தையமின் பற்றிப் பார்ப்போம்.
இந்த B1 - தையமின் வைட்டமின் என்பது, நவரத்தினங்களில் வைரம் போல, உடலுக்கான நுண்சத்து தேவைகளில் மதிப்பு மிக்க ஒன்றாகும்.
இந்த தையமின் வைட்டமின், உண்ட உணவிலிருந்து சக்தியை விடுவித்து உடலுக்கு அளிப்பதில் உதவி செய்கிறது. இந்த சக்தி விடுவிப்பு செயலைச் செய்வதால் உடலின் முக்கியச் நிகழ்வுகளான பசி, ஜீரனம் மற்றும் நரம்பு மண்டலச் செயல்பாடுகளில் முக்கியப் பங்காற்றுகிறது. இந்த தையமின் இருக்கும் உணவுகளில் மற்ற வகையான நுண் சத்துகளும் செறிந்து காணப்படும்.
நம்ம அபிஷேக் பையன் நல்ல படிப்பாளி, ஜிம்முக்கு எல்லாம் போய் நல்லா உடம்பை மெய்ண்டெய்ன் செய்யும் ஒரு டீனேஜர். ஆனா கடந்த ஆறு மாசமா அவனோட நடவடிக்களால அவனோட ஃபிரண்ட்ஸ் கடுப்பாகி யாரும் அவனோட பேசறதே இல்ல. போன வாரம் அவனோட அம்மா ஏதோ சொல்லப் போய் கோபம் வந்து டீவியத் தூக்கிப் போட்டு உடைச்சிட்டான். இது ஒரு சம்பவம்.
நம்ம கோகிலா டீச்சர், செய்யும் ஆசிரியர் தொழிலில் நல்ல ஈடுபாடு உள்ள, கடமையில் எந்தத் தவறும் செய்யாத, அடுத்தது தலைமையாசிரியையாகப் போகும் ஒரு குடும்பத்தலைவி. இவங்க கொஞ்சம் குண்டாவும் இருக்கறதால சாப்பாட்டைக் குறைச்சு, சிப்ஸ், சாக்கலேட் மற்றும் கூல் டிரிங்க்ஸ்னு ஏதோ ஒன்ன சாப்பிட்டுக்கிட்டு ஒழுங்கான சாப்பாட்டைச் சாப்பிடாம ரொம்ப பிசியா இருக்கறவங்க. ஒரு நாள் திடீர்னு பசியே எடுக்காம போய் எடையிழப்பும் ஆக ஆரம்பிச்சது. இது இன்னொரு சம்பவம்.
நம்ம ஸ்டீஃபன் ராஜ் ஒரு ஓட்டப் பந்தைய வீரன், கொஞ்சம் ரவுடிப் பயலும் கூட. அடிக்கடி தகறாரு ஆகி விழுப்புண்கள் ஏற்படறதும் காயங்கள் ஆறுவதும் சகஜம். ஒரு நாள் அப்படி சாதாரனமா ஆன ஒரு காயம் ரொம்ப நாளா ஆறவே இல்ல. இது மூனாவது சம்பவம்.
மூனு பேரும் டாக்டரைப் பார்க்கப் போனாங்க. டாக்டர் என்ன சொன்னாருன்னு சரியா யூகிச்சிருப்பீங்க. அதான் சார், இந்த மூனு பேரோட பிரச்சினைகளுக்கும் காரணம் தையமின் என்று சொல்லப்படும் வைட்டமின் B1 குறைபாடு. வைட்டமின் B1 சப்ளிமெண்டுகளை கொடுத்ததும் படிப்படியா அவங்க பிரச்சினை சரியாக ஆரம்பிச்சது. உடலின் ஒவ்வொரு செல்களிலும் நடக்கும் ஆக்சிடேஷன் செயல்பாட்டில் B1 முக்கியப் பங்கு வகிக்கிறது. முக்கியமாக நரம்பு மண்டலச் செயல்பாட்டில்.
அதிகப் படியான சர்க்கரை சாப்பிடுவதும் B1 செயல்பாட்டையும் உடலின் B1 வைட்டமின் கிரகிப்புத் தன்மையையும் குறைக்கும். இதனால் நரம்பு மண்டலக் கோளாறுகள் ஏற்பட்டு ஞாபக சக்தி போன்ற மூளையின் செயல்பாடுகளையும் குறைக்கும். இதனால் பிஹேவியரல் குறைபாடுகள் எனப்படும் நடத்தையின் மாற்றங்களைக் கொண்டு வரும். திடீரென மூர்க்கமாக நடந்து கொள்ளுதல் போன்றவை இதில் அடங்கும். ஆம், Big Boss நிகழ்ச்சியில் கஞ்சா கருப்பு அவர்கள் தீயனைப்பு சிலிண்டரை எடுத்து பரணியை அடிக்கப் போனதற்கு B1-தையமின் குறைபாடும் காரணமாக இருக்கலாம்.
டயட் இருக்கிறேன் பேர்வழி என்று சரியான சத்துகள் உள்ள உணவுகளைச் சாப்பிடாமல் போனாலும் B1 குறைபாடு வரும். உடல் உஷ்னம் தொடர்ச்சியாக குறைந்திருந்தால் அது B1 குறைபாடாக இருக்கலாம். மாவுச்சத்து சக்தியாக மாற்றப்பட தையமின் அவசியம் தேவை. நீங்கள் குளூக்கோஸேயே சாப்பிட்டாலும், தேவையான தையமின் உடலில் இல்லையென்றால் குளூக்கோஸ் சாப்பிடதுக்கு உண்டான சக்தி உடலில் சேராது. முக்கியமாக குடிப்பழக்கம் உள்ளவர்களுக்கு தையமின் உடலில் சேராது. உடலில் இருக்கும் தையமினையும் குடிப்பழக்கம் அழித்து விடும்.
மிக மோசமான தையமின் குறைபாடு - தசைகள் கட்டுப்பாடிழப்பு, ஞாபக சக்தி இழப்பு, ஏற்கனவே இருக்கும் உடல் நலக் கோளாறுகளை மேலும் அதிகரிப்பது போன்றவற்றை ஏற்படுத்தி Wernicke-Korsakoff syndrome எனப்படும் மூளை பாதிப்பை உருவாக்கும்.
நரம்பு மண்டலக் கோளாறுகளை உடலில்
நிரந்தரமாக ஏற்படுத்தும்.
மாவுச்சத்து சக்தியாக மாற்றப்படும் போது உருவாகும் லாக்டிக் ஆசிட் சரியாக வெளியேற்றப் படாத போது கால்களில் அசௌகர்யமான ஒரு உணர்வு ஏற்பட்டு Restless Leg Syndrome (RLS) என்ற நிலை வருவதற்குக் காரணம் தையமின் குறைபாடே. இது உடலின் வேறு பகுதிகளிலும் ஏற்படும். கடுமையான உடற்பயிற்சியின் போது ஏற்படும் வலி சரியாவதற்கும் வைட்டமின் பி1 ஐ எடுக்கலாம்.
தையமின் குறைபாடு ஏற்படும் போது ஒவ்வொரு கட்டத்திலும் விதவிதமான அறிகுறிகள் தோன்றும். முதல் நிலையில் சக்தி இல்லாத உணர்வும் சோர்வும் ஏற்படும். மன அழுத்தமும், எரிச்சலான மன நிலையும் ஏற்படும். பசியின்மை ஏற்படும். இதைச் சரி செய்யாத போது அடுத்த நிலையில் இந்த உடல் ரீதியான அசௌகர்யங்கள் அதிகமாகும். தலைவலி, ஜீரனக் கோளாறுகள் போன்றவை ஏற்படும். இதயத் துடிப்பு அதிகமாகும். இதன் அதிக பட்ச குறைபாட்டில் நரம்பு பாதிப்பு ஏற்பட்டு பெரிஃபெரல் நியூரிடிஸ் (peripheral neuritis) என்ற நிலை ஏற்படும். இதனால் கால்களில் மிகுந்த சோர்வு ஏற்பட்டு குறக்களி பிடித்தல், எரியும் உணர்வு, மரத்துப் போதல் போன்றவை ஏற்படும். இந்த அறிகுறிகள் இருந்தால் தையமின் குறைபாடு உள்ளது என்று தெரிந்து கொள்ளலாம். இவை சரி செய்யப் படாத போது உச்ச கட்டமாக பெரிபெரி நோய் ஏற்படும்.
வைட்டமின் பி1 குறைபாடு அதிகமாக இருந்தால் வருவது பெரிபெரி (beriberi) நோய். இந்த நிலையில் இதயத் துடிப்பு அதிகமாக இருக்கும். இந்த நிலை மோசமானால் என்லார்ஜ்ட் ஹார்ட் எனப்படும் இதயம் வீங்குவது போன்றவை ஏற்பட்டு மாரடைப்புக்குக் காரணமாகும். இதில் வெட் பெரிபெரி (wet) மற்றும் டிரை பெரிபெரி (dry) என்ற இரண்டு வகை உள்ளது. உடல் அதிக நீர்ச் சத்தைத் தேக்கி வைத்துக் கொண்டும், இதயக் கோளாறுகளை ஏற்படுத்துவதும் வெட் டைப் பெரிபெரி. நரம்பு மண்டலம் மற்றும் தசைகளில் ஏற்படும் தையமின் குறைபாடு அறிகுறிகள் டிரை டைப் பெரிபெரி. இதற்குச் சரியான சிகிச்சை எடுக்காவிடில் இறப்பு வரை கொண்டு போகும். இதில் வெட் ஃபார்ம் என்பதை சப்ளிமெண்டுகள் மூலம் முற்றிலும் சரிப்படுத்தலாம். ஆனால் டிரை ஃபார்ம் கோளாறுகளை அவ்வாறு முற்றிலும் சரி செய்ய முடியாது. அது உடலில் நிரந்திரமான பாதிப்பை ஏற்படுத்தும்.
பி1 குறைபாடு இருந்தால் உடலில் உள்ள நரம்புகளைச் சுற்றி உள்ள myelin எனப்படும் பாதுகாப்பு உறை சிதையும். இந்தக் குறைபாடு இருக்கும் போது இப்படி சிதைந்த myelin ஐ மறு சீரமைக்க முடியாது. இந்த நிலையில் விரல்கள், கைகள், கால்கள் மற்றும் பாதங்கள் மரத்துப் போகும் நிலை அல்லது டிங்கிளிங் எனப்படும் கூச்ச உணர்வும் ஏற்படும். இதனால் நீரிழிவு நோய் உள்ளவர்களுக்கு பெரிஃபெரல் நியூரோபதி எனப்படும் நரம்பு மண்டலக் கோளாறு வைட்டமின் பி1 குறைபாட்டால் ஏற்படும்.
***நீரிழிவு நோய் உள்ளவர்களுக்கு சராசரி மனிதர்களை விட 15 மடங்கு அதிகமாக வைட்டமின் பி1 தேவைப்படும்.
வைட்டமின் பி1 குறைபாட்டால் தலையைத் திருப்பும் போது கண் பார்வை ஒத்துழைக்காமல் போகும். உதாரணத்துக்கு ஒரு பேனாவைப் பார்த்துக் கொண்டு உங்கள் தலையைத் திருப்பினால், தலை போகும் திசைக்கு எதிர்த்திசையில் கண் விழி நகர்ந்து பார்க்கும் பொருள் மீது நிலை கொள்ளும். இதற்கு காதுகளின் உட்புறத்தில் உள்ள நரம்புகளின் ஒருங்கினைப்பால் நடக்கிறது. அதற்கான நரம்புகளின் சமிக்ஞையில், பி1 குறைபாடு இடையூறு செய்கிறது. இதனால் கண் ல்விழி அலைபாயும் நிலை ஏற்படும். இந்த நிலைக்குப் பெயர் Nystagmus. வைட்டமின் பி1 சரியான அளவில் எடுப்பதால் இந்நிலை சரி செய்யப்படும்.
அதிகப்படியான ஸ்டிரெஸ் என்று சொல்லப்படும் மன அழுத்தம் பி1 குறைபாட்டை ஏற்படுத்துகிறது.
இந்த முக்கியமான பி1 (தையமின்) வைட்டமினின் பரிந்துரைக்கப்பட்ட ஒரு நாள் அளவு பின் வருமாறு:
உடல் ரீதியான பிரச்சினைகள் எதுவும் இல்லையென்றால்:
குழந்தைகளில் இருந்து 18 வயதுக்கு உட்பட்டவர்களுக்கு : 0.2 முதல் 1.4 மில்லி கிராம் (மருத்துவர்களிடம் ஆலோசனை பெற்றே பி1 சப்ளிமெண்ட் எடுக்க வேண்டும்)
18 வயதுக்கு மேல் : ஆண்களுக்கு 1.2 மிகி, பெண்களுக்கு 1.1 மிகி.
பாலூட்டும் தாய்மார்களுக்கு : 1.4 மிகி
தையமின் குறைபாடு இருந்தால்: 50 மிகி வரை மாத்திரையாகவோ அல்லது ஊசி மூலமாகவோ எடுக்க வேண்டும்.
குடிப்பழக்கம் நிறுத்தியவர்களுக்கு அவர்களின் வித்டிராயல் அறிகுறிகளைச் சரிப் படுத்துவதற்காக 100 மிகி ஊசி மூலம் கொடுக்கப்பட வேண்டும்.
நீரிழிவு உள்ளவர்களுக்கு 18 முதல் 20 மில்லி கிராம் வரையில் பி1 தேவை.
தையமின் சப்ளிமெண்ட்டை எடுப்பதன் மூலம் கொசு போன்ற சிறு பூச்சிகள் அணுகுவதில் இருந்து தப்பிக்கலாம். பூண்டு அதிகம் சேர்ப்பதும் கொசுக்கடிகளில் இருந்து தப்பிக்க வைக்கும்.
கீழ்க்கண்ட அறிகுறிகள் தெரிந்தால் உங்கள் உடலில் வைட்டமின் B1 குறைபாடு உள்ளது என்று அர்த்தம்.
. மனக் குழப்பம்
. பசியின்மை
. சோர்வு
. ஞாபகமறதி
. தலைவலி
. எரிச்சலான மற்றும் பதட்டமான மன நிலை
. மன அழுத்தம்
. இதயத்துடிப்பு அதிகமாதல்
. தூக்கமின்மை
. நரம்புக் கோளாறுகள்
தினசரி ஆல்கஹால் குடிக்கும் பழக்கம் உள்ளவர்களின் மூர்க்கமான செயல்பாடுகள் தையமின் குறைபாட்டினால் ஏற்படுவதே.
கீழ்க்கண்டவைகள் வைட்டமின் பி1 குறைபாட்டை உருவாக்கும்.
. ஆல்கஹால்
. ஆண்டிபயாடிக்ஸ்
. காஃபி மற்றும் டீ
. சிறுநீரகப் பிரச்சினைக்குக் கொடுக்கப்படும் மருந்துகள்
. கருத்தடை மாத்திரைகள்
. சர்க்கரை
. உணவுகளில் சேர்க்கப்படும் ரசாயனங்கள்
. ஆஸ்த்துமாவுக்குக் கொடுக்கப்படும் தியோஃபைலின் மருந்துகள்
இதே தையமின் அதிகமாக எடுத்தால் உடலின் வைட்டமின் பி6ஐயும் மக்னீசியம் குறைபாட்டையும் உருவாக்கும்.
வைட்டமின் பி1 உள்ள உணவுகள்:
. நட்ஸ் எனப்படும் கொட்டை வகைகள்
. மாமிசம் மற்றும் ஈரல்
. பூண்டு
வைட்டமின் B1 உள்ள உணவுகளை தினசரி சேர்ப்பதன் மூலம் வைட்டமின் B1 சம்பந்தமான பிரச்சினைகள் உடலுக்கு வராமல் பாதுகாப்போம்.